សារពីនាយកស្ថាប័ន
តាងនាមវិទ្យាស្ថានស៊ីតិក ខ្ញុំមានកិត្ដិយសដ៏ឧត្ដុង្គឧត្ដម ជម្រាបជូន អ្នកសិក្សា ឱ្យបានជ្រាបថា វិទ្យាស្ថានស៊ីតិក គឺជាគ្រឹះស្ថានឧត្ដមសិក្សាមួយដែលមានកេរ្ដិ៍ឈ្មោះលើការបណ្ដុះបណ្ដាលជំនាញបច្ចេកវិទ្យាព័ត៌មានវិទ្យា និងឌីហ្ស៉ាញ (ប្លង់ និងរចនា)។ វិទ្យាស្ថានស៊ីតិក មានទីតាំងស្ថិតនៅតាមបណ្ដោយផ្លូវសហព័ន្ធរុស្ស៊ី ដែលជាតំបន់ប្រជុំទៅដោយគ្រឹះស្ថានឧត្ដមសិក្សា ពោលគឺផ្ដល់ភាពងាយស្រួលសម្រាប់ការស្វែងរកពីសំណាក់អ្នកសិក្សា និងអ្នកពាក់ព័ន្ធ។
វិទ្យាស្ថានស៊ីតិក មានអាគារនិងបន្ទប់សិក្សាមានបំពាក់សម្ភារបរិក្ខាសិក្សាគ្រប់គ្រាន់សម្រាប់បំពេញឱ្យការសិក្សាមានភាពរលូន រួមមានម៉ាស៊ីនត្រជាក់ LCD Projector បណ្ណាល័យ e-book និង video training ជាដើម។ វិទ្យាស្ថានមានសាស្ដ្រាចារ្យមានបទពិសោធន៍ សញ្ញាបត្រខ្ពស់ និងវិជ្ជាជីវៈលើការបង្រៀន។
វិទ្យាស្ថានស៊ីតិកមានការិយាល័យសិក្សា និងសេវានិស្សិត ដែលជំរុញដល់និស្សិតនៅឆ្នាំចុងក្រោយមានឱកាសចុះធ្វើការងារតាមក្រុមហ៊ុន អង្គការ និងស្ថាប័នផ្សេងៗ ទៅតាមភាពខ្លាំងរបស់ពួកគេ។ កិច្ចការនេះធ្វើឱ្យនិស្សិតដែលបញ្ចប់ការសិក្សាពីវិទ្យាស្ថានស៊ីតិកភាគច្រើនមានការងារធ្វើភ្លាមៗ ដែលស្របនឹងពាក្យស្លោក៖ «ចាប់ផ្ដើមការសិក្សាជាមួយយើង បញ្ចប់ជាមួយឱកាសការងារ»។
វិទ្យាស្ថានស៊ីតិកទទួលបានការទទួលស្គាល់ពីក្រសួងអប់រំ យុវជន និងកីឡា និងគណៈកម្មាធិការទទួលស្គាល់គុណភាពអប់រំក្នុងព្រះរាជាណាចក្រកម្ពុជា។
ដើម្បីឆ្លើយតបនឹងការវិវឌ្ឍន៍របស់ប្រទេស និងសង្គម វិទ្យាស្ថានប្ដេជ្ញាអភិវឌ្ឍលើ៖
• ការអភិវឌ្ឍកម្មវិធីសិក្សាឱ្យកាន់តែប្រសើរឡើង
• ការពង្រឹងគុណភាពនៃសម្ភារៈសម្រាប់កិច្ចការសិក្សា
• ការជ្រើសរើសសាស្ដ្រាចារ្យល្អៗដែលអាចធានាគុណភាពការបង្រៀនឱ្យនិស្សិតមានសមត្ថភាពជាងអ្នកដទៃ។
ជាទីបញ្ចប់ ខ្ញុំមានសង្ឃឹមថាគុណភាពបណ្ដុះបណ្ដាលរបស់វិទ្យាស្ថាននឹងឈានដល់កម្រិតអភិវឌ្ឍន៍ និងសូមជូនពរអ្នកសិក្សាទាំងអស់ឱ្យមានអនាគតរុងរឿង!
